agosto 2006

a. XII, n. 4  [67]

 

 

Ammentu de Angelina

di Salvatore Sini

torna a

 AGOSTO 2006

Chie hat giradu su mundu comente a mie, de zertu m'ascultat chena de s'ispantare; chie invece no hat happidu custa possibilidade, a bortas ti parede chi ti leede pro mesu faularzu. Pro custu, chi a bortas nde fatto a mancu de contare carchi cosa, e cando nd'hapo sa 'ozza mi las iscrio.

Iscriende in sardu no hapo nemmancu su timore chi muzere mia si ponzat a leggere sas cosas mias, ca no cumprendet sa limba. No chi hapa nudda de cuare, chi a essere sinzeru, da e cando mi so cojuadu hapo sempre chircadu de mi cumportare comente unu bonu maridu e unu bonu babbu de famiglia.

Cando sos americanos isbarchein in sa luna, si narat chi b'agatteini sos napoletanos chi faghiana sas pizzas, giustu prò narrere chi los agattas in tottue. Ma puru sos sardos no burulana, ca si puru los agattas in tota s'Europa, m'est capitadu de nd'agattare in India, in Giappone, in Argentina e in ateros cuzolos de su mundu.

S'incontru chi m'ammento de piusu lu fattesi in Franza, e prezisamente a Marsiglia. No est sempre chi capitat de abbojare de cuddas feminas bellas, o unu pagu feittas chi siana, chi però hana carchi cosa chi las faghene apparrer subitu interessantes, siat pro su modu de faghere, siat pro sa simpatia o pro su modu de si presentare. De feminas bellas che nd'hat in tottue, ma cando ti capitant custas de su genere, calesisiat omine nde restat unu pagu imbaddinadu, e proite no, carchi pensamentu naturale curret in sos trobojos de sa fantasia.

Su ricevimentu in onore de sa nave ue fia imbarcadu, offertu dai sa Marina Franzesa, fit già cominzadu dai pius de mes'ora e, finidos sos discursos e sos saludos de ritu, una bella orchestrina cominzeit a sonare e in giru de pagos minutos no bi resteit una femina libera ca totas benzeini impignadas a ballare. S'unicu fessu chi si fit baraddadu istesi eo, e cando creia de passare sa sera solu a buffare e assazzare pasticcinos, s'oju meu ch'andeit a finire in una bella pisedda, s'unica restada libera. “Forsi no l’haiat invitada niunu pro timore de unu rifiutu", pensesi . L'invitesi eo e ballesi cun issa pro tota sa sera.

Si naraiat Angelina e, destinu de sa sorte, fit sarda. De cuddas sardas dechidas, no tantu alta, mora, bene fatta e proporzionada, elegantissima e cun duos ojos mannos e profundos chi mi lassein incantadu. Sa gentilesa e sa simpatia fini ateras prendas chi s'annanghian a su restu.

Finida sa serada, mi pregheit de che l’accumpanzare a domo sua, in su Consoladu italianu de Marsiglia, in cantu mi neit chi fit impiegada in su matessi. A chentu metros prima de ch'arrivire si frimmeit, nos saludemus e mi ringrazieit meda de sa bella serada passada umpare, restende de accordu de nos torrare a biere s'incras a sas chimbe de sa sera pro faghere una bella passizada e passare sa sera umpare.

Sa notte guasi no drommesi pensende a cale fortuna mi fit capitada e no bidia s'ora chi esseran arrividas sas chimbe prò andare a s'appuntamentu. A sas batter e mesa che fia già in su logu e, puntuale a sas chimbe, la 'idesi arrivire bella, elegante e profumada chi pariat una de cuddas attrices famosas chi tantas bortas disizamun e sonniamus de haer carchi rapportu de amistade. Cuntrestende e passizende chircaia sempre de che la giughere in sos logos pius centrales, pius che ateru prò sa suddisfascione de mi fagher notare dai sos collegas mios chi, diffattis, cando los incontraia, faghiana milli cumprimentos e si ortaiana tres o battoro ortas cun carchi pagu de invidia.

Finemus sa serada in unu bellu locale fin a cando, verso sas deghe, mi pregheit de che l’accumpanzare a su Consoladu, ca no si sentiat tantu 'ene. Restemus de accordu de nos torrare a biere sa die sighente a sa matessi ora e in su matessi logu. L'aisettesi fin’a sas ses e mesa, ma a s'appuntamentu no bi 'enzeit.

Pensende chi li fìt suzessa carchi cosa, sa manzana posca andesi a su Consoladu pro la chircare. Unu usceri tantu gentile m'accumpanzeit in un'offisciu in ue bi fini sas ischedas de sos dipendentes, siat sas ischedas de tottu sos italianos. Nesi su lumine a s'impiegadu e, no agattendela in sos addettos a su Consoladu, la chircheit tra sos italianos de Marsiglia.

Angela…. nata a….. il 21 maggio 19….

Coniugata e separata da...…, cittadino francese.

Ha scontato mesi tre di pena per reati contro la morale.

Indagata per reati contro il patrimonio.

Domicilio attuale: Hotel Papillon.

Impiego attuale: prostituta.