giugno 2006

a. XII, n. 3  [66]

 

 

Sa domitta 'e minnannu Melone

 

di Antonio Grixoni

torna a

 GIUGNO 2006

Est’ ancora meda bella sa domitta

‘e s’amigu caru Minnannu Melone

Ed eo l’happo meda affezione

Ca mi paret che cappella beneitta.

 

Cantas voltas nos semus vidos

Settidos in sa ziminera, in sa gianna.

Isse tottu etzu, a pompa manna

fattendhemi contos de cazza e de bandidos.

 

Ma in sa domitta sun remonidos

Sos pius bellos e caros affettos

Ca inie sun tottu sos segretos

Ei sos carignos dados e retzidos.

 

In sa domitta sacra che pramma

In silenziu che fide ausentada

B’est impressa sa segreta cuntrestada

Chi che columbos si fatteini babbu e mamma.

 

In cussa domitta tantu amore

B’happo appresu pro ispiritu ‘e guida

E s’in seddha so ancora in sa vida

Lu devo tottu a issa, cuss’onore.

 

Ricchesa chi su tempus no cancellat

Tottu fruttu nadu dai su veru amore

E cun isse sos istiles de su valore

C’abbelini ammentos e parentela.

 

Oh! Domitta chi m’has vidu appena nadu!

Innotzente messazzeru ‘e allegria;

Grazie meda pro sa tanta poesia

Chi cun estru dai coro m’has contadu.

 

Dulches ammentos de oghes amenas

Oe che tandho in coro ligadas,

Sa pabassa, sa ua madura appiccada

Ei sas cubas de inu onu pienas.

 

Mendhula, cariga e pabassinos,

Mele, abbattu, tiliccas, casadinas

Bundhantes, saboridas coghinas

Ei s’abba frisca in sos cadinos.

 

Ei su fusile cun sa caltuccera

A unu giau appiccados in su muru

Chi pariana nendhe: “Antoni, tue puru

No t’abbandones dai custa caminera”.

 

Su bi pensare mi ponet s’inninnisgiu

‘e cussu tempus connottu e passadu;

Su sorigalzu ‘e linna in su sostre paradu

Ei sos upos fattos de oltisgiu.

 

Ciao, domitta, ca mi ses cara

A ti onorare onz’ora m’impreo;

Inue ses tue happìa esser’eo

Fin’a sa trista ora ‘e sa bara!