giugno 2006

a. XII, n. 3  [66]

 

 

S'umbra mia

 

di Salvatore Sini

torna a

 GIUGNO 2006

Ando peri custu mundu

trazende s’esistenzia

barria de pensamentos e de gosos.

S’umbra mia addainanti,

romasa, longa e poderosa,

de ghia mi faghet, quidada,

in sos caminos de sa vida.

E penso a cuss’umbra lizera

cumpanza mia fidele,

chi mi la giutto infattu

da e su manzanu chitto,

mudende sempre formas e maneras.

Biad’a tie, umbra, chi no has pesu

ne coro ne fastizos ne affettos,

no t’istraccas mancu in logos trettos

e unu lamentu mai t’hapo intesu.

E penso contemplende s’umbra mia

chi como mi caminat a fiancos,

e si mi ‘olto, issa no bidet s’ora

de mi sighire in tundu

sutta e subra, a mie,

ch’intantu penso catecantu,

pro cantos annos mi sigat ancora.

 

Premiata al Concorso

A.C.L.I. Sardegna, novembre 2004